جاري ابو زينب و(( سيد مكاوي ))…..!


 
الصدى-جاري ابو زينب وسيد مكاوي-سعد-الاوسي

قبل احتلال العراق كان لي جار اسمه ابو زينب ..رجل كبير بالسن له ثلاث بنات….ابو زينب (( اريحي حيل )) كان قبل التاسع من نيسان 2003 يتناول العشاء تقريباً بصورة شبه يومية مع عائلته في المطاعم ويرتاد المسارح ويعود مع عائلته في ساعات الليل المتاخرة ….ومع ان رزقه وعمله كان فوق الجيد الا انه متذمر من الوضع ….المهم ما ان جاء يوم 9 نيسان 2003 (( اليوم الاكشر )) حتى تحول ابو زينب الى محلل سياسي كبير بالمنطقة …وراح يشرح لي ويقول …..الان جاء الخير….فسالته (( اشلون بالله ماتفرحني ))…؟! فقال لي وبلهجته ….اجونه ناس كلهم ساده اهل دين يخافون الله واولهم واحد اسمه السيد الجعفري هذا راح يكلب العراق يسويلنياه جنه …ومن ثم اردف قائلا….راح نكدر نسافر مناه وصاعد الى جميع الدول بدون فيزة ..والحصة التموينية راح تصير 98 مادة ..فسالته اشلون 98 ابو زينب يقولون انها 100 مادة ..فقال لا معلوماتي 98 …(( ضابطها ضبط العكال ابو زينب ))…

المهم سالته وبعد شراح يصير فقال (( كل واحد قطعة ارض 300 متر وقرض 200 مليون دينار وسيارة اقساط وتعيينات الكل )) فقلت له يعني بنتك راح تتعين فقال بغضب شديد وتعجب (( بنتي ))……بناتي ثلاثتهن راح يعينوهن …فسالته وبعد شراح ينطونه فقال (( خصم الحجي راح نصير احلى وافضل من دول الخليج يا امارات يادبي ياكويت ))….! المهم حتى مانطول السالفة عليكم بقي جاري ابو زينب يعدد لي الحقوق الي سنقبضها الا انه وبعد فترة اصبح ابو زينب مايكدر يخرج راسه من الباب اي جليس الدار يشرب ( جاي ويجر نركيله ويرجع ليوره ) واصبح ينام من الساعة السباعة من الخوف والهلع …فجأة اختفى ابو زينب بليلة ظلمة من المنطقة فبقيت ابحث عنه فلم اجده الا صدفة بعد سنتين اي في العام 2005 فسالته (( هااي انت وين اختفيت )) فقال لي (( اسكت شردت بليلة ظلمة وبعت بيتي سكتاوي بفلس ونص )) فسالته وما السبب فقال لي (( ذبولي ورقة بكراج البيت كالولي حضر نفسك اجاك السره ))….؟!! فقلت له والحصة ام 98 و (( الكيعان والتعيينات مال البنات والسيارات وراح نصير مثل الخليج وين صارت )) فرمقني بنظرة (( صعد عين ونزل عين )) وقال تصنف موووووووووووووووو ..عمي اشمرديني يجونه جوكة حرامية ..فقلت له (( هااه هااه اشلون تغلط على السيد الجعفري هيج كان رئيس وزراء حينها )) فاجابني سيد موو ….. هذا سيد مكاوي اشرف منه …..!

المقال السابقالقهر..باء
المقال التالىقلق سينمائي
رئيس مجموعة المسلة الاعلامية التي تضم بينها قنوات (( المسلة )) و (( العراق الان )) ومواقع كتابات الوطني وسومر نيوز والمسلة الاخباري وصحيفة الشاهد المستقل الاسبوعية....
المزيد عن الكاتب

لا تعليقات

اترك رد