قطايف مسلاسلات رمضان


 
الفرق بين مصطفي شعبان في أبو البنات ، ومصطفي شعبان في دكتور أمراض نساء

– الفرق بين مصطفي شعبان في أبو البنات ، ومصطفي شعبان في دكتور أمراض نساء .. زي الفرق بين نور الشريف في الحج متولي ، ونور الشريف في العطار والسبع بنات .

– تتر مسلسل الميزان الأفضل حتي الآن .

– الميزان .. أحمد خالد موسي بيثبت أن الخطوة التانية تابتة هي كمان مش التالتة بس .

– هي ودافنشي .. من الطبيعي لما ليلي علوي تاخد فيلا في التجمع أتعاب قضية ، يطلع لها “خالد الصاوي” عفريت ، أومال هيطلع لها الليث الحافي مثلاً .

– فوق مستوي الشبهات .. يسرا مفترية تمثيل كالعادة ، وسيد رجب مش ممكن عين ماتقفش قدامه .

– ممثلين مسرح مصر سيبوا افيهاتكوا في البيت وانتوا جايين الله يكرمكوا .

– الحقيقة أن ظهور تاتو مي عز الدين .. ظهر أكتر من مي عز الدين نفسها ، بس من غير ما يتكتب علي التتر .

– لمة العيلة إعلان حلو بجد واختيار الشخصيات مبهر الحقيقة ، وأحلي ما في العمل كلمات المليجي ، وإخراج تامر مهدي .

– بعد موضة تسريب ألبومات عمرو دياب .. السنة دي موضة تسريب المسلسلات .

– أفراح القبة .. هشام نزية عامل موسيقي عالمية ، ومحمد ياسين صورته فوق الخيال .

– أفراح القبة .. أول مره أشوف صابرين في سنها الطبيعي ، وصبري فواز مولانا العبقري ، جمال سليمان مختلف تماماً .

– مسلسلات السنة دي برعاية وزارة الداخلية ، والأكشن برعاية الشؤون المعنوية .

– شهادة ميلاد .. عمرو سمير عاطف ، طارق لطفي ، أحمد مدحت ، ثلاثي مرعب الصراحة .

– ليالي الحلمية : اللي نطلع بيه من الحلقة الأولي ، أن كل اللي في الحلمية ماتوا . ومفضلش غير إلهام شاهين في دور بنت البنوت اللي مخلفة عادي .

– سقوط حر .. المشهد الأول عين نيللي كريم بتنطق وكأن راكبها عفريت تمثيل .

– سقوط حر .. صعود سريع لمريم نعوم ، ووائل حمدي .

– بيومي فؤاد بيلعب اكورديون في الكيف ، مش فاضله غير يغني تتر مسلسل ويبقي كده تمام أوي .

– الكيف .. باسم سمرة هو بيغني كفيل يخليك تعتكف عن الفرجة علي المسلسلات في رمضان ، وتتجوز وتقعد في البيت .

– أوعي يجيلك إدوراد أسم علي مسمي .

– بنات سوبر مان .. بيأكد أن اللي بيضحك قبل الممثلين ورق مكتوب صح .

– القيصر .. يوسف الشريف يخليك تقتنع تمام بالمثل اللي بيقول “اللي مثل مامتش” .

– الخانكة .. غادة عبد الرزاق مش بتحلو شكل وبس تمثيل كمان .

– الخانكة .. شياكة ماجد المصري ، سيلفي مراته ، موتوسكيل غادة الرازق ، كلب فتحي عبد الوهاب ، شعر العيال بتوع مدارس اللغات .. أبرز ما في الحلقة الاولي .

– ملخص اليوم الأول .. أنا شفت كلمة “بوليس” أكتر ما شفت أداء ممثلين ، إلا من رحم ربي .

المقال السابقماذا وراء غبار الحرب في الفلوجة؟
المقال التالىالقيروان : مرحبا رمضان
سيناريست وروائى وكاتب صحفى مصري درس الموسيقى العربية والتمثيل والسيناريو ، أشتهر بكتابة المقالات الساخرة ومهاجمة الإعلاميين ، ومن أشهر مقالاته "كيف تصبحين ريهام سعيد في 10 خطوات" ومقال "عشرة على عشرة" الأسبوعى ، كما يكتب بجريدة الأخبار محلق "النهاردة أجازة" سلسلة مقالات "متغربين إحنا" .....
المزيد عن الكاتب

لا تعليقات

اترك رد